ليه ما بنعرفش نفضفض لبعض؟؟؟

يا ترى لو الواحد فينا تعبان ومخنوق ومضايق ومش قادر يتنفس من الخنقه , ممكن يلاقى حد يثق فيه ويحكيلو او يفضفض معاه فى الكلام ولو لقى حد يحكيلو يا ترى لما يتكلم معاه هايستريح ولا هايتعب ويا ترى الانسان الى هايحكيلو هايكون امين ولا هايعرف الناس كلها اسرارك ويا ترى هو هايحس بيك ولا هايبقى مخنوق وانت بتحكيلو مشاكلك وبتنكد عليه

اكيد كل واحد فينا عنده مشاكل وخنقاه وما بتنيموش الليل والمشاكل مالهاش دعوه بالسن ولا بالمسئوليه لان كل سن وليه مشاكله وكل انسان وليه مسئولياته حتى الطفل بتبقى مشكلته انه عايز يلعب وامه عايزه تنام وتنيمهومشكلته ازاى ينام وهو مش كابس عليه النوم وبالنسبه للاطفال دى كارثه لان كميه النوم الى بينامها الانسان البالغ اكبر بكتير من الى بينامها الطفل يعنى كتير اوى انه يستناها لما تصحى عشان تلاعبه وممكن يعيى بسبب تعبه ده وكتير من الناس ماتعرفش ان دى فى حد ذاتها مشكله بالنسبه للطفل

وبرضه الانسان الى بيمرض مرض خطير واحتمال نجاته منه ضعيف ما بيكونش حد حاسس بيه على قد ما هو حاسس بالعذاب والخوف واحساس الشفقه الى بيشوفه من الناس القريبه ليه وفى الاخر بيبقى ذكرى ناس بتفتكره وكتير لا واكيد مع مرور السنين مش هايلاقى حد يفتكرهوده طبيعى

والبنوته الى مش حلوه بتتعذب لما تلاقى صاحبتها بتتعاكس وهى لا مع انها هىمحترمه وست بيت اكتر من صاحبتها وبرضه ماحدش بيحس بيها حتى لما سنها بيكبر ويتاخر جوازها وتبدا تحس بحاجات كتير نفسها فيها ونفسها تجربها

لانها بتسمع عنها من صاحباتها وجاراتها الى اتجوزو ولما تلاقلا الى اصغر منها متجوزين وهى لسه مع انها والله بتكون احسن منهم فى حاجات كتير بس نصيبها كده

والشاب الى بيتخل فيه اعاقه وما بيقرش يشتغل ولا يصرف على نفسه ولا يدافع عن نفسه ولا عن اهله تخيلو كده وهو ماشى مع اخته وحد عاكسها حد ممكن يوصف كميه العذاب الى بيبقى فيها والذل مع ان الاخ الى عاكس اخته ده مابيستفدش حاجه غير التهريج والسخريه وفرد عضلاته على الفاضى

والاتنين الى بيحبه بعض ومش عايزين غير انهم يكونو مع بعض وهى دى قمه سعادتهم وبيلاقو مواجهه من اهلهم هو من حماته وهى من حماها مع انهم ماشيين فى الطريق الصح مش زى الناس الى بتعرف بعضها من ورا اهلهم ليه الصح دايما بيتعامل كانه غلط مع ان الغلط فى حياتنا بقى كتير اوى واتعودنا عليه واتعودنا نشوفه ونسكت

ولا الزوجه الى بتطلب من جوزها طلبات تخليه يكره حياته مع انها بتكون عارفه ان ظروفه صعبه ليه ما بتحسش بيه وتشاركه اوقاته الصعبه زى ما بتشاركه اوقاته الحلوه

ليه الناس ما بتحطش نفسها مكان بعضها عشان تحش ببعضها ويكون كل واحد بيتعامل مع الانسان التانى زى ما يحب ان الانسان التانى يعامله يا ترى ده حلم ان الانسان يكون فعلا انسان زى ما ربنا خالقه ليه اغلب الناس اتحوله لحيوانات كل واحد بيعيش عشان ياكل التانى وياخد من التانى الى معاه ليه بقت حياتنا غابه ليه الابن مش لاقى حنيه من ابوه ولا الاب لاقى قرب من ابنه ليه الاخ مش حاسس باخوه ولا الاخت بتلاقى اخوها بيخاف عليها عارفين لو كملت الاسئله الى عندى مش هلاقى مكان اكتبها فيه واكيد مش هلاقى اجابه لان للاسف احنا اتعودنا على كده

والمشكله بعد ده كله الى متضايق من حاجه ما بيلاقيش حد يفضفض معاه يا ريت يكون المنتدى ده مكان ان اى حد فيكو يلاقى حد يفضفضله ويحكيلو واكيد هانتناقش مع بعض عشان نحل اى مشكله وناخد راى بعض

يا ريت ما اكونش طولت عليكو ولا كنت ممل فى كلامى انا والله كان عندى كلام كتير كنت عايز اقوله بس ماحبتش اتقل عليكو

باى باى ومستنيكو ومستنى فضفضتكو